Zai's POV
Kanina pa ako naglalakad upang hanapin ang classroom ko, pambihira naman kasi! Sobrang laki nitong eskwelahan na 'to pagkatapos wala man lang sa aking ibinigay na mapa.
"Zai!" Balak ko na sanang lumiko sa kaliwang bahagi nang nakarinig ako ng tumawag sa akin.
Huh? Ako ba 'yon? Pero baka hindi. Imposible namang may nakakakilala sa akin dito. Baka ibang tao lang na kapangalan ko. Hindi ko na lang pinansin at dumiretso na lang ako sa paglalakad.
"Zai! Yohoo! Zai Venom!" Halos manlaki ang mga mata ko nang narinig ko ang buo kong pangalan.
Napalingon ako sa aking likuran kung saan ko narinig na may tumawag sa akin. Napansin ko ang isang babae na tumatakbo patungo sa aking direksyon. Naningkit ang dalawa kong mata dahil tila pamilyar sa akin ang mukha ng babaeng tumatakbo papunta sa direksyon ko. Nakangiti itong lumapit sa akin na parang close kami.
"Kumusta? Dito ka pala nag-aaral?" medyo may pagka-hyper na tanong niya sa akin. Napakunot ang noo ko dahil hindi ko naman siya kilala pero kilala niya ako.
"Uhm...sino ka?" tanong ko sa kaniya. Bahagya namang nagulat ang hitsura niya dahil sa tanong ko.
"Hindi mo ako nakikilala?" Napakamot ako sa batok matapos n'yon. Magtatanong ba ako kung kilala ko siya? "Thea ang pangalan ko. Thea Vergienza. Grabe ka! Ba't hindi mo ako natandaan? Magkaklase tayo noong highschool 'no!" pakilala niya saka niya ako hinampas sa braso.
Napaisip naman ako saglit hanggang sa maalala ko na nga. Siya pala 'yong classmate ko noong Grade 7 ako, ang kaso napalipat siya sa ibang section pagtungtong niya ng Grade 8 kaya siguro hindi ko siya natandaan kaagad.
"Naaalala ko na." Bigla namang nagliwanag ang hitsura niya matapos ko 'yong sabihin.
"Talaga? Gosh! May kakilala na ako rito! Nga pala, saan ang room mo?" Napaisip naman ako bigla.
Ano nga bang number ng room ko? Ay shunga! Nakalimutan ko! Saan ba rito ang HRM Building?
Napatigil ako sa pag-iisip nang nakarinig kami ng sigawan ng mga babae sa may ibaba. Wala na sana akong balak na alamin kung ano'ng mayroon, ngunit kaagad akong hinatak ni Thea saka kami bumaba ng first floor nitong building.
"Saan ba tayo pupunta?" tanong ko. Pagkababa namin sa hallway ng first floor ay sobrang daming babae sa paligid. Halos mapatakip ako sa tainga ko dahil sa lakas ng mga sigawan. Parang mga baboy na kinakatay!
"Oh my goodness gracious!" sigaw ni Thea habang nakatakip pa ang isang kamay sa kaniyang bibig.
"Ano ba kasing mayroon?" Hindi ko naiwasang mapangiwi dahil sa totoo lang ay nakakairita ang sigawan ng mga babae sa paligid.
"Ang guwapo! Zai, tingnan mo!" May kung ano'ng itinuro si Thea kaya naman napatingin ako sa may bandang dulo ng hallway at nakita ang isang grupo ng mga lalaki. Parang sa kanila ang daan dahil nahawi sa gilid ang mga babae.
"Gosh, sis! Daraan na sila rito! Kailangan kong magpaganda!" rinig kong bulong ng isang babae sa aking likuran.
Naningkit na lang ang dalawa kong magagandang mata nang nakita kong kilala ko ang pitong lalaking iyon. Teka, bakit nandito sila sa building na 'to?! Alam kong dito rin sila nag-aaral pero bakit nandito sila sa building na 'to?!
"A-ano, Thea aalis na ako! Bye!" Tumalikod na ako para sana makaalis na sana.
"Zai!" Pakineng tape! Boses 'yon ni Josh! Syete! Balak ba nila akong bwisitin ngayong araw?!
"Huh? Zai, kilala mo sila?" Dahan-dahan akong napalingon sa gawi ni Thea nang nagtanong ito. Napahinto naman ako sa aking kinatatayuan nang napansin na halos lahat ng estudyante rito ay sa akin nakatingin.
"Huh? Ako?" Turo ko sa sarili, bago pagak na napatawa. "Hindi! Hindi 'no. Aalis na ako. Bye!" Sinadya kong lakasan ang boses ko para marinig ng pitong kolokoy.
Hindi ko na siya pinansin at nagmadali na lang akong umalis sa lugar na iyon. Narinig ko pang sinigawan ako ni Tres pero hindi ko nalang pinansin.
Sikat pala sila rito sa University?! Ba't hindi nila sinabi?! Tinitilian talaga sila ng mga babae. Ngayon ko lang na-realize 'yong mga tingin sa akin ng mga babae kanina, para nila akong babalatan ng buhay!
Sa ilang minuto kong paglalakad ay nakahanap ako ng bench at doon naisipang umupo. Mga ilang minuto rin akong nandoon hanggang sa maalala ko na ang room number ko.
205 sa HRM building.
Napahinga ako nang malalim. Napatingin naman ako sa aking relo. Nanlaki ang dalawa kong mata nang nalamang ten minutes na pala akong late.
Naalala ko, iba-iba nga pala ang schedule ng mga students dito. Hindi na ako nag-aksaya pa ng oras at kaagad na akong nagtungo sa HRM Building dahil naraanan ko na pala iyon kanina nang naghahanap pa ako kung nasaan 'yong room ko.
Nagulat ang lahat nang bigla kong binuksan ang pintuan. Napansin ko ang isang prof sa harapan na tinaasan ako ng kilay.
"First day of classes but you are late. Mind introducing yourself in front?" masungit nitong tanong. Tumango na lang ako sa kaniya bago lumakad sa may unahan.
"I'm Zai Venom, and I am 18 years old. Nice to meet you," pakilala ko saka ko sila nginitian.
Matapos n'yon ay lumakad na ako papunta sa aking upuan. Napansin ko na kompleto na kaming lahat, itong inuupuan ko na lang ang bakante kanina. Maya-maya lang ay nagpatuloy na ang prof sa pagdi-discuss. Mga topics lang naman na kailangan naming pag-aralan for the first semester. Ni-dismiss na rin kaagad kami pagkatapos.
Since hindi pa naman nagb-bell para sa break time ay bawal pa kaming lumabas. Kinuha ko na lang ang cellphone ko baka sakaling may text galing kay mama, ngunit nadismaya ako dahil ni kumustahin man lang niya ako ay wala. Nagtataka na tuloy ako kung bakit hindi siya nagpaparamdam. May nangyari kaya?
Napailing-iling ako dahil sa mga bagay na pumapasok sa utak ko. Sana naman wala. Napalingon ako sa may tabi ko nang may kumalabit sa akin; isang babaeng maputi, straight ang itim nitong buhok, at may bilugang mukha.
"Bago ka rito?" mahinhing tanong niya sa akin.
"Oo e. Ikaw?"
"Matagal na kami rito, simula pa noong high school dito na kami nag-aaral." Napatango-tango ako sa sinabi niya. "Siya nga pala, this is Nathalie Asuncion. Ako naman si Claudette Benjamin, Dette for short. Nice to meet you." Tinanggap ko ang kamay ni Claudette at Nathalie nang inilahad nila ito sa akin bilang pagpapakilala.
"Zai Venom. Nice to meet you rin," wika ko, eksakto naman ang pag-bell kaya tumayo kaagad sina Nathalie at Claudette.
"Cafeteria?" pag-aya ni Claudette kaya naman tumayo na ako at sumunod na lang din sa kanila.
Naglalakad kami papuntang cafeteria nang biglang may tumawag sa akin. Paglingon ko ay nakita ko si Thea, tumatakbo papunta sa direksyon namin.
"Ang daya mo! Ba't mo ako iniwan kanina?" nagtatampong tanong niya sa akin. Tinaasan ko lang siya ng kilay.
"Dapat ba hindi?" Napairap siya sa akin bago nagawi ang tingin sa aking likuran nang napansin niya ang dalawang babaeng nasa likod ko.
"Friends mo?" tanong niya. Balak ko pa lang siyang sagutin pero kaagad na siyang naglahad ng kamay ro'n sa dalawa. "Hi! Ako nga pala si Thea," masayang pakilala niya na ikinatawa nang bahagya nina Nathalie.
Hindi ko na lang sila pinansin nang magsimula na silang mag-kwentuhan ng kung ano-ano. Close agad? Hay naku. Inunahan ko na lang sila sa paglalakad at naunang pumasok sa loob ng cafeteria. Marami na ring mga estudyante ang nandito.
"Ang bilis mo naman maglakad," rinig kong wika ni Nathalie na nasa may likuran ko.
"Doon na lang tayo umupo!" Napatingin ako sa table na itinuro ni Thea. Eksaktong apat ang upuan doon kaya naman hindi na kami umangal.
Nang tuluyan kaming nakaupo ay nagsimula na namang umingay ang cafeteria. Pambihira! Ganito na ba palagi ang ganap dito? Huwag nilang sabihin na nandito na naman 'yong pito?
"Dette, nandito na 'l'yong Bulletproof Gang," rinig kong bulong ni Nathalie kay Claudette. Napakunot-noo naman ako sa sinabi ni Nathalie.
Bulletproof Gang? Sino naman 'yon? Pagtingin ko sa may entrance ay biglang pumasok sina kuya Jino. Napatayo ako nang wala sa oras.
"Oh Zai, ano'ng problema?" nagtatakang tanong sa akin ni Thea, napatingin din 'yong dalawa sa akin.
"Bibili ako ng pagkain," nasabi ko na lang.
Balak ko na sanang kunin 'yong wallet ko sa bulsa ng aking palda ngunit nagtaka ako nang wala akong nakapa, kaya naman hinalungkat ko ang bag ko, pero kahit tiningnan ko na ang bawat bulsa n'yon ay hindi ko pa rin natagpuan.
Bakit wala?! Nandoon 'yong pera ko!
"What's wrong?" tanong sa akin ni Claudette. Napatingin naman ako sa kanila.
"Nalintikan na," mahinang bulong ko. Sabay-sabay naman silang napa-ha sa sinabi ko.
Saan ko ba kasi 'yon nilagay? Urgh! Kailangan kong alalahanin.
Inisip ko kong saan ko 'yon maaaring maiwan. Nilagay ko naman 'yon sa bulsa ko bago ako umalis, pero naalala ko na kumain nga pala ako kasabay 'yong pito—teka...hindi kaya...naiwan ko sa lamesa? Pero kung naiwan ko 'yon posibleng makita 'yon nina kuya Jino.
Wait...'yong kanina sa hallway, noong tinawag ni Josh at Tres 'yong pangalan ko...hindi kaya...napapikit ako nang mariin. Talaga naman, Zai!
Napatingin ako sa gawi nila at nakita silang nagtatawanan. Bigla namang nabaling ang mata rito ni Josh, at nagulat na lang ako nang itinaas niya ang kaniyang kamay at ipakita niya sa akin ang wallet ko habang may malaking ngisi sa mukha niya.
Crap.